من نحن
دار هن – ببساطة احنا دار نشر نسوية، وكمان مكتبة فيها كتب متنوعة ومختارة بعناية، وعندنا مساحة للمذاكرة والعمل؛ يعني تقدروا تيجوا وتذاكروا وتستمعتوا بالهدوء والتركيز، وممكن وانتوا ماشيين تشتروا كتب كمان.
هن إتأسست في اغسطس 2017 كدار نشر نسوية عشان مؤمنين بإن النسوية نظرية وممارسة قادرة إنها تغير علاقات القوى الموجودة في مجتمعنا وقادرة تخلينا نعيش في عالم أفضل من كده. طيب إحنا بننشر للنساء بس؟ لا طبعا إحنا بننشر للرجال والنساء اللي بيعبروا في كتاباتهم/ن عن تجربة مختلفة ومتميزة بشرط ما تكونشي كتابة ذكورية ولا أبوية…
فيديو تعريفي
عملنا
أهداف هن
- بنحاول نقدم نموذج لدور النشر اللي بتساهم في الحراك الثقافي اللي ممكن يعمل تغيير،
- مهتمين بنشر الكتابات النسوية سواء كانت كتابات إبداعية أو نظرية، وسواء عربية أو مترجمة أو موجهة للأطفال كمان،
- كمان بنسعى إننا نبقى مكان آمن للنساء قادر على دعمهن سواء على المستوى الإبداعي أو الثقافي،
- مهتمين كمان بنشر الأفكار النسوية بشكل غير مغلوط؛ لأن كتير من الناس بالفعل عندها أفكار مغلوطة عن النسوية،
- كمان بنحاول- من خلال ورشنا- اننا نطور الشباب والشابات في مجال المعرفة والبحث النسوي.
أنشطتنا
احنا بنعمل حاجات متنوعة، ممكن نقسمها لأربع مكونات أساسية
الأول: دار النشر؛ زي ما قلنا إحنا بننشر كتب نسوية سواء كان اللي كاتبها نساء أو رجال.
التاني: المكتبة؛ عندنا مكتبة بنعرض فيها كتب دور النشر الأخرى بالإضافة إلى الكتب الصادرة من الدار. أسعار الكب مناسبة جدا. المكتبة فيها كتب نسوية، وروايات، وكتب نظرية مختلفة…. تعالوا زورونا وشوفوا مكتبتنا
الثالث: Working space عندنا مكان مريح وهادي علشان تعرفوا تذاكروا بمزاج وبعيد عن الدوشة، كمان بنوفر مكان للمجموعات الصغيرة (5 أفراد) علشان لو عندكم /كن اجتماع أو عايزين تذاكروا أو تشتغلوا مع بعض. المكان فيه انترنت سريع ومشروبات ساقعة وسخنة. ممكن تقعد طول اليوم وتاخد مشروب واحد ب25 جنيه. ولو تحبوا تاكلوا ممكن تطلبوا ديلفري.
الرابع: بنعمل ورش مختلفة لتطوير المهارات في مجالات مختلفة زي الكتابة والتصوير وكتابة السيناريو ، والاثنوجرافيا نسوية… الخ.
عندنا كمان ايفنت “في صحبة الكتابة” بنعمله بشكل منتظم في السبت الأول من كل شهر. بنحاول نعمل مع بعض مجتمع للكتابة. هتلاقي معاك/معاكِ من تقرأ له، ومن يساعدك في الكتابة إذا كنت في حاجة لده. نقاشات محفزة وملهمة للكتابة. في اليوم ده هنشتغل مع بعض بشكل جماعي وكمان بشكل فردي. في كل شهر بنعلن عن نوع جنس مختلف للكتابة وبيبقى فى صحبتنا مدرب/مدربة مختلف/ة.
بنعلن عن الورش قبلها بوقت كافي، ولو حابين تتابعوا ورشنا ابعتولنا علشان نتواصل معاكم/ن.
