ليلة بنت خلاف وبديعة

الوصف

الأيام من طبعها تعدي، ويا تسيب في قلبك حسرة، يا تسيب في قلبك بهجة، يا تسيب الإتنين في قلبك، وده أجمل وأصعب ما فيها؛ معنى الكلام: الأيام مرت والبيت عمدانه إتفككت، اللي بنى بيت بحري البلد، واللي ترك وسافر، الصبايا من أحفاد لِيلة كبروا، اللي عشقت واللي هربت، واللي طاعت وعاشت في بيت جوزها، اللي حبلت واللي ولدت واللي كرهت، واللي كتمت سرها في قلبها وبنت عليه مية حيطة. والشمس بعتها ربنا كل يوم لحد الأرض ما زهقت وكبرت وإبتدت تلم أوراقها، الشعر الأبيض ملا الرووس، الضهور إتحنت والأحفاد كمان بقوا رجالة، اللي مات واللي مشي، اللي سافر واللي هاجر واللي رجع، واللي خان واللي غدر واللي حفظ الجميِّل، اللي باع واللي إشترى واللي إطفت الدنيا في عينه، كله مدَّون على الحيطان؛ والكلام إتكتب وإتمسح وإتكتب من تاني، لحد حيطان البيت نفسها ما زهقت.